Famous rugby player Lawrence Dallaglio put his trophies up for sale after bankruptcy.

එංගලන්ත රග්බි ක්‍රීඩාවේ සුප්‍රසිද්ධ ක්‍රීඩකයෙකු වන ලෝරන්ස් ඩලාග්ලියෝ සිය දික්කසාදයෙන් පසු ඇති වූ දැඩි මූල්‍ය අර්බුද හේතුවෙන් තමන්ට හිමි වූ ලෝක කුසලාන ජයග්‍රාහී පදක්කම ඇතුළු වටිනා සමරු භාණ්ඩ විකිණීමට තීරණය කර තිබේ. 54 හැවිරිදි වියේ පසුවන ඔහු සහ ඔහුගේ බිරිඳ වූ ඇලිස් අතර පැවති වසර 20 ක විවාහය නිමාවීමෙන් පසුව ඔහු අධික ලෙස මුදල් වියදම් කිරීම මීට ප්‍රධාන හේතුවක් වී ඇත.

මේ හේතුවෙන් පසුගිය වසරේදී ඔහු බංකොලොත් වූවෙකු ලෙස නිල වශයෙන් ප්‍රකාශයට පත් කරනු ලැබීය.

මූල්‍ය දුෂ්කරතා හේතුවෙන් නිරිතදිග ලන්ඩනයේ රිච්මන්ඩ් හි පිහිටි ඔවුන්ගේ පවුලේ නිවස පසුගිය මැයි මාසයේදී පවුම් මිලියන 2.4 කට විකිණීමට ඔහුට සිදු වූ අතර, ඊට පෙර එහි වටිනාකම පවුම් මිලියන 3.3 ක් ලෙස තක්සේරු කර තිබුණි. මෙම නිවස විකුණා පසුදිනම ඔහුව බංකොලොත් වූවෙකු ලෙස නම් කළ අතර, ඔහුගේ ක්‍රීඩා සමාගමෙන් ලබාගෙන තිබූ පවුම් 366,500 කට අධික අධ්‍යක්ෂක ණය මුදලක් පියවීම සඳහා නිවාස අලෙවියෙන් ලැබුණු ඔහුගේ කොටස ලබා දෙන ලෙසට නියෝග කෙරිණි. සාමාන්‍යයෙන් බංකොලොත්භාවය පිළිබඳ සීමාවන් මාස 12 කින් අවසන් වුවද, ඩලාග්ලියෝගේ එම කාලසීමාව විනිසුරුවරයෙකු විසින් පසුගිය මාසයේදී තවත් වසරක් දක්වා දීර්ඝ කර ඇත.

'ඩේලි ටෙලිග්‍රාෆ්' වාර්තාවන්ට අනුව, අගෝස්තු සිට ජනවාරි දක්වා කාලය තුළ ඔහු පවුම් 200,000 ක ආදායමක් උපයා තිබුණද, ණය පියවීමට කිසිවක් ඉතිරි නොකර දිගින් දිගටම විශාල වශයෙන් මුදල් වියදම් කර ඇත. ඔහු සෑම මසකම ඇඳුම් සහ ගමන් වියදම් සඳහා පවුම් 1,000 ක් ද, මත්පැන් සඳහා පවුම් 500 ක් ද වැය කර ඇති බව එම වාර්තාවල සඳහන් වේ. මෑතකදී සහභාගී වූ පොඩ්කාස්ට් වැඩසටහනකදී අදහස් දක්වමින් ඔහු ප්‍රකාශ කර තිබුණේ දික්කසාදයේ ප්‍රතිඵලයක් ලෙස තමන් බංකොලොත් වූ බවත්, මීට වඩා හොඳින් තම මූල්‍ය කටයුතු කළමනාකරණය කර ගැනීමට හැකියාව තිබූ බවත්ය. ඔහුගේ වටිනා සමරු භාණ්ඩ එකතුව ඔක්තෝබර් 13 වන දින නෝර්තැම්ප්ටන්ෂයර් හි වෙලිංබරෝහි 'බඩ්ස්' වෙන්දේසි මධ්‍යස්ථානයේදී වෙන්දේසි කිරීමට නියමිත අතර,

එයින් පවුම් 180,000 ක පමණ මුදලක් රැස් කර ගැනීමට අපේක්ෂා කෙරේ. මෙහිදී 2003 ලෝක කුසලාන ජයග්‍රාහී පදක්කම පවුම් 50,000 ත් 80,000 ත් අතර මුදලකට අලෙවි වනු ඇතැයි ගණන් බලා ඇති අතර, 2007 ලෝක කුසලාන අනුශූරතාවයේ පදක්කම පවුම් 10,000 ක් ලෙස තක්සේරු කර තිබේ. මීට අමතරව ලන්ඩන් වොස්ප්ස් කණ්ඩායම නියෝජනය කරමින් දිනාගත් යුරෝපීය කුසලාන සහ ලීග් ශූරතා පදක්කම් ද (එකක් පවුම් 8,000 බැගින්), බ්‍රිතාන්‍ය සහ අයිරිෂ් ලයන්ස් තොප්පියක් (පවුම් 5,500) සහ එංගලන්ත තොප්පියක් (පවුම් 5,000) ද මෙම වෙන්දේසියට ඉදිරිපත් කිරීමට නියමිතය.