මත් ජාවාරමා අත්අඩංගුවට ගන්න යද්දී බාධා කළැයි බිරිඳ, මව, සොයුරියන් කූඩුවට

හංවැල්ල, හේන්පිට ප්‍රදේශයේදී මත්ද්‍රව්‍ය ජාවාරම්කරුවෙකු අත්අඩංගුවට ගැනීම සඳහා ගිය පොලිස් නිලධාරීන්ගේ රාජකාරියට දැඩි ලෙස බාධා කිරීමේ චෝදනාව මත එකම පවුලේ කාන්තාවන් සිව්දෙනෙකු හංවැල්ල පොලිසිය විසින් අත්අඩංගුවට ගෙන ඇත. මෙම සිදුවීමට සම්බන්ධ වී ඇත්තේ අදාළ ප්‍රධාන සැකකරුගේ මව, බිරිඳ සහ සහෝදරියන් දෙදෙනෙකු වන අතර, ඔවුන් පිළිවෙළින් වයස අවුරුදු 48, 21, 20 සහ 18 යන වයස්වල පසුවන බව පොලිස් වාර්තා අනාවරණය කරයි.

මෙම සිදුවීම් මාලාව ආරම්භ වී ඇත්තේ හංවැල්ල පොලිසියේ උප පොලිස් පරීක්ෂක අබේනායක මහතා ඇතුළු කණ්ඩායමක් විසින් ජල්තර ප්‍රදේශයේදී සිදුකළ වැටලීමක් මගිනි. එහිදී අයිස් මත්ද්‍රව්‍ය මිලිග්‍රෑම් 80ක් සන්තකයේ තබාගෙන සිටි ඇඹුල්ගම, සමගි මාවතේ පදිංචිකරුවෙකු වන විසිපස් හැවිරිදි තරුණයෙකු පොලිස් භාරයට ගෙන තිබේ. ඔහුගෙන් සිදුකරන ලද ප්‍රශ්න කිරීම්වලදී අනාවරණය වී ඇත්තේ අදාළ මත්ද්‍රව්‍ය තමන් වෙත ලබාදුන්නේ හංවැල්ල හේන්පිට ප්‍රදේශයේ පදිංචි වයස අවුරුදු 22ක පුද්ගලයෙකු විසින් බවයි.

ලැබුණු එම තොරතුරුවලට අනුව ක්‍රියාත්මක වූ පොලිස් කණ්ඩායම හේන්පිට ප්‍රදේශයේ පිහිටි සැකකරුගේ නිවසට ගොස් ඔහුව පරීක්ෂාවට ලක් කර ඇත. එහිදී ඔහුගේ සන්තකයේ තිබී නීතිවිරෝධී මත්පෙති 08ක් සොයාගැනීමට පොලිසිය සමත් වී ඇති අතර, ඔහුව අත්අඩංගුවට ගැනීමට උත්සාහ කිරීමේදී නිවසේ සිටි ඔහුගේ පවුලේ සාමාජිකාවන් සිව්දෙනා කලහකාරී ලෙස හැසිරෙමින් පොලිස් රාජකාරියට මෙලෙස බාධා පමුණුවා තිබේ.

අදාළ අවස්ථාවේදී මෙම කාන්තාවන් අත්අඩංගුවට ගැනීම සඳහා ප්‍රමාණවත් තරම් නිලධාරීන් පිරිසක් එම ස්ථානයේ නොසිටි බැවින්, පොලිසිය එම අවස්ථාවේදී ඔවුන්ව අත්අඩංගුවට ගෙන නොමැත. පසුව එම සැකකාරියන් සිව්දෙනා හංවැල්ල පොලිස් ස්ථානය වෙත පැමිණි අවස්ථාවේදී ඔවුන්ව අත්අඩංගුවට ගැනීමට පොලිසිය පියවර ගෙන ඇති අතර, ඔවුන් සියලුදෙනාම අධිකරණයට ඉදිරිපත් කිරීමට නියමිතව ඇත.