කිසිදු හේතුවක් නොමැතිව අත්අඩංගුවට ගෙන රඳවා සිටි කම්කරුවා පොලිසියට එරෙහිව නඩු කියා ජයගනී

ඌරගස්මංහන්දිය පොලිසියේ නිලධාරීන් පිරිසක් විසින් කිසිදු හේතුවක් ඉදිරිපත් නොකර කම්කරුවකු අත්අඩංගුවට ගෙන, ඔහුව මහේස්ත්‍රාත් අධිකරණයට ඉදිරිපත් නොකර රහසිගතව රඳවා තබා ගැනීමෙන් මූලික අයිතිවාසිකම් උල්ලංඝනය කර ඇති බව ශ්‍රේෂ්ඨාධිකරණය තීන්දු කළේය. මෙම නීති විරෝධී ක්‍රියාවට වගකිව යුතු පොලිස් නිලධාරීන් දෙදෙනාට සිය පෞද්ගලික මුදලින් රුපියල් 40,000 බැගින් වන්දි ගෙවන ලෙස නියෝග කළ විනිසුරු මඬුල්ල, රජය විසින් පෙත්සම්කරුට රුපියල් 20,000ක අතිරේක වන්දි මුදලක් ගෙවිය යුතු බවටද නියම කළේය.

නවඳගල ප්‍රදේශයේ පදිංචි ඉන්දික පුෂ්පකුමාර නමැති පුද්ගලයා විසින් ඉදිරිපත් කරන ලද මූලික අයිතිවාසිකම් පෙත්සමක විභාගය අවසන් කරමින් මෙම තීන්දුව ප්‍රකාශයට පත් විය. ශ්‍රේෂ්ඨාධිකරණ විනිසුරුවරුන් වන ජනක් ද සිල්වා, ආචාර්ය සෝභිත රාජකරුණා සහ මේනකා විජේසුන්දර යන මහත්ම මහත්මීන්ගෙන් සැදුම්ලත් විනිසුරු මඬුල්ල හමුවේ මෙම පෙත්සම විභාගයට ගැනුණු අතර, අනෙකුත් විනිසුරුවරුන්ගේ එකඟත්වය සහිතව තීන්දුව ප්‍රකාශයට පත් කරන ලද්දේ ආචාර්ය සෝභිත රාජකරුණා මහතා විසිනි.

පෙත්සම්කරු සිය පෙත්සම මගින් පෙන්වා දී තිබුණේ තමන් වෘත්තියෙන් කම්කරුවකු බවත්, ඌරගස්මංහන්දිය පොලිසියේ වගඋත්තරකාර නිලධාරීන් පිරිසක් විසින් කිසිදු පූර්ව දැනුම්දීමකින් තොරව තමන් අත්අඩංගුවට ගත් බවත්ය. එසේ අත්අඩංගුවට ගැනීමෙන් පසුව තමන් අධිකරණයට ඉදිරිපත් නොකර සහ කිසිදු ඥාතියකුට දැකබලා ගැනීමට ඉඩ නොදී රහසිගත ආකාරයෙන් පොලිස් ස්ථානය තුළ රඳවා තබා ගැනීමෙන් සිය මූලික අයිතිවාසිකම් බරපතළ ලෙස කඩවී ඇති බව ඔහු අධිකරණය හමුවේ තර්ක කර තිබුණි.

මෙම චෝදනාවලට පිළිතුරු දෙමින් වගඋත්තරකාර පොලිස් නිලධාරීන් අධිකරණයට දන්වා සිටියේ පෙත්සම්කරු සන්තකයේ මත්ද්‍රව්‍ය ඇතැයි යන සැකය මත මෙම අත්අඩංගුවට ගැනීම සිදුකළ බවයි. කෙසේ වෙතත්, ඉදිරිපත් වූ කරුණු හා සාක්ෂි සලකා බැලූ ශ්‍රේෂ්ඨාධිකරණය තීන්දු කළේ සැකකරු අත්අඩංගුවට ගෙන නියමිත පරිදි මහේස්ත්‍රාත්වරයකු වෙත ඉදිරිපත් නොකර රඳවා තබා ගැනීම තුළින් පොලිසිය නීතිය උල්ලංඝනය කර ඇති බවයි.

ඒ අනුව, පෙත්සමේ වගඋත්තරකරුවන් ලෙස නම් කර සිටි ඌරගස්මංහන්දිය පොලිසියේ උප පොලිස් පරීක්ෂක බාලේන්ද්‍රන් සහ පොලිස් පරීක්ෂක ජනක යන නිලධාරීන් දෙදෙනා විසින් පෙත්සම්කරුගේ මූලික අයිතිවාසිකම් කඩ කර ඇති බව තහවුරු විය. මීට අමතරව ඇල්පිටිය ප්‍රදේශය භාර ජ්‍යෙෂ්ඨ පොලිස් අධිකාරිවරයා ඇතුළු පිරිසක්ද මෙම පෙත්සමේ වගඋත්තරකරුවන් ලෙස නම් කර තිබුණි.

මෙම නඩු විභාගය සඳහා පෙත්සම්කරු වෙනුවෙන් නීතිඥ තිෂ්‍ය වෙරගොඩ මහතා පෙනී සිටි අතර, නීතිපතිවරයා වෙනුවෙන් රජයේ ජ්‍යෙෂ්ඨ නීතිඥ ඉඳුනි පුංචිහේවා මහත්මිය අධිකරණය හමුවේ කරුණු දක්වන ලදී. සියලු කරුණු සලකා බැලූ අධිකරණය අවසානයේ වන්දි නියෝග ප්‍රකාශයට පත් කරමින් නඩුව අවසන් කළේය.