රක්වාන පන්සලේ පෙරහැරට ගෙනා අලියා කළ පහරදීමෙන් දෙන්නෙකු මරුට

රක්වාන ප්‍රදේශයේ විහාරස්ථානයක වාර්ෂික පෙරහැර මංගල්‍යයකට සහභාගී කරවීම සඳහා රැගෙනවිත් සිටි අලියෙකු කුපිත වී සිදුකළ පහරදීමකින් ඇත්ගොව්වා සහ ඔහුගේ සහායකයා ජීවිතක්ෂයට පත්වීමේ ශෝකජනක පුවතක් වාර්තා වේ. මෙම අවාසනාවන්ත සිදුවීම සිදුව ඇත්තේ රක්වාන ශ්‍රී උභයතිලකාරාම විහාරස්ථානය කේන්ද්‍ර කරගනිමින් සංවිධානය කර තිබූ 78 වන පොසොන් මහා පෙරහැර භූමිය ආසන්නයේදීය.

පසුගිය 21 වනදා පැවැති මෙම පෙරහැර මංගල්‍යය වෙනුවෙන් අලි ඇතුන් දෙදෙනෙකු විහාරස්ථානය අසල රඳවා තබා තිබී ඇත. ඉන් අනතුරුව 22 වනදා උදෑසන කාලයේදී ඉන් එක් අලියෙකුට පැන් පෙවීම සඳහා ඇත්ගොව්වාගේ සහායකයා විසින් සත්වයා රක්වාන ගඟ දෙසට රැගෙන ගොස් තිබේ.

එහිදී කිසියම් හේතුවක් මත ක්ෂණිකව කුපිත වූ අලියා සහායකයාට දරුණු ලෙස පහරදී පාගා ඝාතනය කර ඇත. එම අවස්ථාවේදී සහායකයාගේ මරණ බියෙන් නැඟුණු කෑගැසීම ඇසී ඔහුව බේරාගැනීම සඳහා එම ස්ථානයට දිව ආ ප්‍රධාන ඇත්ගොව්වාට ද අලියා විසින් ප්‍රහාර එල්ල කර ඇති අතර, ඔහුද එම ස්ථානයේදීම ජීවිතක්ෂයට පත්ව තිබේ. මෙම ද්විත්ව මිනිස් ජීවිත හානිය සිදුකිරීමෙන් අනතුරුව, එම අලියා විහාරස්ථානය අසල පිහිටි කුඹුරු යායක් දෙසට පලාගොස් ඇත.