'ස්ට්‍රීට් ෆුඩ්' කන්න ගිහින් බඩේ අමාරුව හදාගත්තද?

දකුණු ආසියාතික රටවල වීදි ආහාර හෙවත් 'ස්ට්‍රීට් ෆුඩ්' සඳහා පවතින්නේ අසීමිත ඉල්ලුමකි. විශේෂයෙන්ම ඒවායේ පවතින සුවිශේෂී රසය, අඩු මිල සහ ඕනෑම තැනකදී පහසුවෙන් ලබාගත හැකි වීම නිසා බොහෝ පිරිසක් මග දෙපස විකිණීමට ඇති කෑම වර්ග අනුභව කිරීමට දැඩි රුචිකත්වයක් දක්වති.

කෙසේ වෙතත්, පවතින අධික උණුසුම් කාලගුණයත් සමඟ මෙවැනි ආහාර පරිභෝජනය කිරීම ඔබේ සෞඛ්‍යයට බරපතළ තර්ජනයක් විය හැකි බව සෞඛ්‍ය අංශ අනතුරු අඟවයි.

පරිසර උෂ්ණත්වය ඉහළ යන විට ආහාර ද්‍රව්‍ය ඉතා ඉක්මනින් නරක් වීමට ලක්වන අතර විවෘත පරිසරයේ පවතින බැවින් ඒවා තුළ බැක්ටීරියා වර්ධනය වීම ශීඝ්‍රයෙන් සිදු වේ. බොහෝ විට වීදි ආහාර නිසි ලෙස ආවරණය කර නොමැති වීම නිසා මැස්සන්, දූවිලි සහ විවිධ වෛරස් වර්ග එම ආහාරවලට පහසුවෙන් එක් විය හැකිය. එසේම මෙම ආහාර පිළියෙළ කිරීම සඳහා භාවිත කරන ජලය පිරිසිදු නොවීම හේතුවෙන් ආහාර විෂ වීම් (Food Poisoning) සිදුවීමේ ඉහළ අවදානමක් පවතින අතර, එහි ප්‍රතිඵලයක් ලෙස වමනය, පාචනය, දැඩි උදරාබාධ සහ උණ වැනි රෝගී තත්ත්වයන් මතු වේ.

උණුසුම් කාලගුණයේදී වීදි ආහාර අනුභව කිරීමෙන් පසු වමනය හෝ පාචනය ඇති වුවහොත් ශරීරයෙන් ජලය සහ අත්‍යවශ්‍ය ඉලෙක්ට්‍රෝල වර්ග ශීඝ්‍රයෙන් බැහැර වීමට පටන් ගනී. මෙම තත්ත්වය දරුණු විජලනයකට මග පාදන අතර, එහි ලක්ෂණ ලෙස ක්ලාන්තය, කට වියළීම, අධික තෙහෙට්ටුව සහ ඇඟ පත අප්‍රාණික වීම හඳුනාගත හැකිය. අධික දහඩිය දැමීම හේතුවෙන් ශරීරයට දැනටමත් ජලය අහිමි වී ඇති පසුබිමක මෙවැනි තත්ත්වයක් ඇති වීම ජීවිතයට පවා අනතුරුදායක විය හැකිය.

වීදි ආහාර පිළියෙළ කිරීමේදී සාමාන්‍යයෙන් අධික ලෙස තෙල් සහ කුළුබඩු වර්ග භාවිත කරන අතර, එය මිනිස් සිරුරේ ආහාර ජීර්ණ පද්ධතියට දැඩි පීඩනයක් එල්ල කරයි. මෙවැනි ආහාර ජීර්ණය කිරීම සඳහා ශරීරයට වැඩි කාලයක් සහ ශක්තියක් වැය කිරීමට සිදුවන බැවින් නිරන්තරයෙන් ගෑස්ට්‍රයිටිස්, අජීර්ණය සහ බඩ පිපීම වැනි අපහසුතාවන් ඇති විය හැකිය. විශේෂයෙන්ම ආහාර ජීර්ණය දුර්වල පුද්ගලයන් මෙවැනි ආහාර නිරන්තරයෙන් ලබාගැනීමෙන් දිගුකාලීන ආමාශගත රෝගවලට ගොදුරු වීමේ ප්‍රවණතාවක් පවතී.

අපිරිසිදු පරිසරයක සකස් කරනු ලබන ආහාර හරහා විවිධ බැක්ටීරියා සහ වෛරස් ආසාදන ශරීරගත වීමේ විශාල ඉඩකඩක් පවතී. ආහාර පිළියෙළ කරන්නන්ගේ පිරිසිදුකම අවම වීම සහ සෞඛ්‍යාරක්ෂිත ක්‍රමවේද අනුගමනය නොකිරීම නිසා ටයිෆොයිඩ්, කොලරාව වැනි බරපතළ රෝග ව්‍යාප්ත වීමේ අවදානමක් පවතින බව වෛද්‍යවරු පෙන්වා දෙති. මෙවැනි ආසාදන බොහෝ විට සංකීර්ණ සෞඛ්‍ය ගැටලු දක්වා වර්ධනය විය හැකි බැවින් බාහිරින් ආහාර ලබාගැනීමේදී ඒ පිළිබඳව දෙවරක් සිතා බැලීම අත්‍යවශ්‍ය වේ.

සෞඛ්‍යයට අහිතකර වීදි ආහාර දිගුකාලීනව පරිභෝජනය කිරීම මගින් ශරීරයේ ස්වභාවික රෝග ප්‍රතිශක්තිකරණ පද්ධතිය ක්‍රමයෙන් දුර්වල වීමට පටන් ගනී. ශරීරයට අවශ්‍ය නිසි පෝෂණය නොලැබීම සහ නිරන්තරයෙන් විවිධ ආසාදනවලට ලක් වීම නිසා ප්‍රතිශක්තිකරණ පද්ධතිය අඩපණ වන අතර, එහි ප්‍රතිඵලයක් ලෙස පුද්ගලයෙකු ඉතා ඉක්මනින් රෝගාබාධවලට ගොදුරු වීමේ හැකියාව පවතී. එවැනි රෝගී තත්ත්වයන්ගෙන් සුවය ලැබීමට පවා සාමාන්‍ය තත්ත්වයට වඩා වැඩි කාලයක් ගත වන බව වෛද්‍ය පර්යේෂණ මගින් තහවුරු වී ඇත. (NDTV ඇසුරිනි)